الفن مش حرام والقتل كمان مش حرام بس القتل دفاعا عن نفسك، عرضك، مالك ومواقف كثير كذلك الفن في المجمل مش حرام فالخط العربي فن، الخزف فن، نسج السجاد فن، العمارة فن، الشّعر وَالْخَطَابَة فن وفنون كثير ليها قيمة حقيقية ومش حرام. ​

⠀​

بس خلينا صُرحاء مع نفسنا احن كلنا عارفين كويس أنه النسبة الأعظم من إلى بنشوفه علي التلفزيون وبنسمعه علي الراديو أو الموبايل والإنترنت يا أصلا مش فن من ركاكة المنتج وقلة جودته يا إما فن بس حرام. ​

⠀​

شفت موضوع المطرب إلى اعتزل وربنا يثبته لكن مش هتكلم عنه شخصيا لأن الموضوع بسيط واحد تاب لله والإنسان ضعيف ممكن يرجع تاني ويتوب تاني ويرجع ويتوب ويرجع ويتوب ولا فيها أي مشكلة لكن نتمنى له الثبات -بإذن الله-. ​

⠀​

إلى هتكلم عنه هو ردة فعل بعض الناس من الوسط "الفني" وآخرين من عاشقي "الفن" ​

⠀​

لو لاقيتوا ناس متضايقة أن حد بيقول علي شيء حرام إنه حرام وأنه قرر يبعد عنه، الناس دي أنا شاف أنهم ينقسمون لطرفين. ​

⠀​

طرف فيه ناس مش عايزين يتم وصمهم أنهم بيعملوا شيء حرام مش علشان الدين لا لا لا... من زاوية الوجاهة المجتمعية الطبقية يعني إيه أكون رقاصه وبغني وباخد ١٠٠ ألف دولار في حفلة أو اكتر وتيجي أنت يالي مالكش لازمه تقولي إن إلى بعمله حرام!!! لا طبعا … ده فن

⠀​

الطرف الآخر ناس بيعملوا الحرام كل يوم ومش قادرين يفهمون أن الإسلام يساع أنك تعمل الحرام ( هتتحاسب طبعا) بس تكون عارف أنه حرام وفي ذرة ندم أو بتتخانق مع نفسك علشان تسيب الحرام ده، فامش عايزين يعترفوا ان الي بيعملوه ده حرام لانهم خايفين يقضوا حياتهم بيعملوا حرام في حرام وهما مش قادرين يبطلوا فابينيموا ضميرهم وللأسف بعضهم بيوصل بيه الجرأه علي الله بإنه بيحلل الحرام علنا بين الناس ودي بقى كارثة اكبر بكتير جدا جدا من انك تعمل الحرام وانت معترف انه حرام . ​

⠀​

لذلك تلاقي ردة فعل الناس دي علي إي حد يجيب سيرة الدين​

⠀​

- الموضوع ده بينك وبين ربنا​

⠀​

- وأنت ليه بتعرفنا أنك بتتوب ما تتوب من سكات ​

⠀​

- ماتقولش حرام مش عاجبك ماتشفوش وماتسمعوش​

⠀​

- أنت مين علشان تحكم علي الناس​

⠀​

- ماحدش عارف مين هيروح جنه أو النار​

⠀​

- عارف إلى بيرقص وبيغني ومقضيها ده ممكن يكون اقرب الي الله منك​

⠀​

- كل واحد حر وربنا الي بيحاسب​

⠀​

- اعمل الي انت شايفه صح لكن ماتربطوش بالدين​

⠀​

- هو انت دارس دين؟ او هو انت شيخ؟ ​

⠀​

وكلام كتير من هذا القبيل لان اي كلام عن الدين بيفكرهم بالي بيعملوه بعد ما حقنوا ضميرهم ببينج كلي طويل الأمد. ​

⠀​

لكن الحمد لله الناس إلى فطرتهم سليمه كتير جدا وبيدعموا أي حد يحاول يقرب لربنا بترك شيء حرام وفي نفس الوقت ممكن يكونوا بيعملوا الحرام بس عارفين أنه حرام وبيتضايقوا أنهم بيعملوه وبيطلبوا من ربنا يقربهم ليه ويبعدهم عن الحرام. ​

⠀​

أحنا ضعاف والحرام سائد في حياتنا خصوصا في الزمن ده وبيزيد وأساليبه بتطور كل يوم... أحنا بنمسك في إي فعل يقربنا لربنا حتى لو كان مجرد بعدنا عن شيء حرام. ​

⠀​

قال رسول الله -صلى الله عليه وسلم- (إِنَّك لَنْ تَدَعَ شَيْئًا لِلَّهِ عَزَّ وَجَلَّ إِلَّا بَدَّلَك اَللَّه بِهِ مَا هُوَ خَيْرٌ لَكَ مِنْهُ)