كلمه (فن) مش كلمه سحرية بتحول الحرام حلال
الكلام ده كنت عايز اكتبه من شهور كنت عايز اعمله فيديو الصراحة وده إلى أخرني بس رسي في الآخر علي أنه يتكتب كمنشور، أرجو بجد أنه يوصل لناس كتير خصوصا المصورين فوتوغرافيا وفيديو... فياريت تساعدونني بمشاركته.
لأن أنا مين هتفرق في المنشور ده وعلشان في ناس ماتعرفنيش، أنا محمد مخيمر مصور فوتوغرافي محترف لأكتر من ١٠ سنين صورت خلالهم حاجات كتير من ضمنها صحافة، أحداث فنية ومهرجانات سينمائية، أفراح وجلسات تصوير موضة وشخصية وحفلات غنائية وبحب تصوير المدن/ السفر والشارع وشوية طبيعة.
هتكلم عن نفسي علشان ماحدش الشيطان يوسوس له أني بنظر عليكم أو ( مهو عمل كده جاي يعمل فيها شريف دلوقتي!)، استعيذوا بالله من الشيطان الرجيم، أنا بكتب الكلام دة لأني وقعت في الغلط ومش عايز حد تاني يقع فيه والي فيه يقدر يلحق نفسه -بإذن الله-.
كتير كان سؤال الحلال والحرام يلح علي بخصوص شغلي وفي المنشور دة مش هقول التصوير نفسه حلال أو حرام لأني لست أهلا للفتوى علشان كده مش هفتي أنا هتكلم عن شيء بيّن مش محتاج فتاوى واضح وضوح الشمس.
وهو إلى بنصوره ، ده إلى حلال أو حرام، ما فيش خلاف على حرمانية التبرج والعري لأنهم أصلا حرام فتصويرهم بالتالي حرام نشر الصور حرام أعظم، للأسف مع انتشار التصوير الفوتوغرافي والفيديو والسوشيال ميديا بقينا بنطبع مع الحرام لدرجه تصل إلى تحليله أو اضعف التطبيع إلى هو (عادي)، لكن في الحقيقة إلى بنعمله ده شيء هنتحاسب عليه حسابا شديدا لأننا عملناه بكامل
إرادتنا + نشرناه كمان، المحظوظون إلى يصوروا أكل ومعمار وحيوانات ومنتجات واي شيء مفهوش بني أدمين فلتوا ولاد الذينه !
بدون تزويق كلام ولف ودوران .. كتير مننا (مصورين/ات) بينزل يصور ستات/بنات لأغراض مختلفة ممكن تكون حملة إعلانية، تصوير الموضة أو مجرد جلسة تصوير شخصية أو بنلعب وبنجرب مع حد نعرفه واهو بنطلع صور حلوة ونإيديت من هنا وهوب جري علي الفيسبوك وانستجرام نزل بسرعة وعبي لايكات مدح وقلووووب... إحساس بالإنجاز، فخر وشكر لكل الناس إلى متبعاك ونزل الصورة إلى بعدها والي بعدها والي بعدها.....
في الحقيقة أنت عارف أن معظم الايكات والشير علشان إلى في الصورة مش الصورة نفسها تقنياً، أنت عارف برضو أنك تعبت وفكرت واتشقلبت بس في الآخر إلى بيثير معظم الناس للتفاعل مع الصورة هو العُري وعلي الرغم أن الموضوع ممكن يكون مش في بالك وأنت مش قاصد خالص بس ده الواقع والى بيحصل أو ممكن تكون قاصدا لأن الناس وجهتك لده وإلا مش هيتفاعلوا مع محتواك لكن في الآخر كل واحد هيتحساب علي افعاله.
لازم نعرف ان اي شيء مصورين او غيرهم بننشره علي السوشيال ميديا داخل في كتابنا الي الله عز و جل يوم الحساب سيسلمنا هذا الكتاب نقرأ أعملنا
وَوُضِعَ الْكِتَابُ فَتَرَى الْمُجْرِمِينَ مُشْفِقِينَ مِمَّا فِيهِ وَيَقُولُونَ يَا وَيْلَتَنَا مَالِ هَٰذَا الْكِتَابِ لَا يُغَادِرُ صَغِيرَةً وَلَا كَبِيرَةً إِلَّا أَحْصَاهَا ۚ وَوَجَدُوا مَا عَمِلُوا حَاضِرًا ۗ وَلَا يَظْلِمُ رَبُّكَ أَحَدًا (49) {الكهف:49}
﴿ فَأَمَّا مَنْ أُوتِيَ كِتَابَهُ بِيَمِينِهِ فَيَقُولُ هَاؤُمُ اقْرَءُوا كِتَابِيَهْ﴾
[ الحاقة: 19]
{ وأما من أوتي كتابه بشماله فيقول يا ليتني لم أوت كتابيه ( ٢٥ ) } [سورة الحاقة]
هل انت/ي عندك استعداد تقابل ربنا بكتاب فيه صور العُري دي! مش بس الصور أنت مكتوب في كتابك حساب علي كل الناس الي شافوا الصور دي.
{ إن الذين يحبون أن تشيع الفاحشة في الذين آمنوا لهم عذاب أليم في الدنيا والآخرة والله يعلم وأنتم لا تعلمون ( ١٩ ) } [سورة النور]
أنا من فترة راجعت كل حساباتي ومواقعي ولسه شغال علي ده مسحت جزء كبير جدا من شغلي من علي الإنترنت، وشغال علي فلترة شغلي اكتر ، برضو أنا مش عايز ارمي الموضوع في وشكم وأجري لأني عارف بعض الردود إلى كنت بضحك بيها علي نفسي زي ما هو لو مانشرتش صور جديدة ماحدش هيجبني في شغل جديد، يعني أبطل تصوير !
انا ماقولتش اني بطلت تصوير انا قولت مسحت الصور الي فيها عري، مرقعه، تبرج بشكل فظ ومثيره وسبت جزء من الصور الي عكس الي فاتوا (ممكن مايكنش كل الي سيبتهم حلال ١٠٠٪) بس متأكد ان الي مسحتهم حرام ١٠٠٪ وماكنش المفروض أعرضهم اصلا وربنا يسامحني ويغفرلي .. يارب.
أحنا مانعرفش العملاء هيلبسوا إيه في التصوير لذلك مش لازم ننزل أي شيء نصوره في صور تكون للعميل فقط ومايتمش عرضها نهائيا، طبعا الأفراح داخلة معانا في الحسبة في بلاوي بتنزل علي الإنترنت حاليا، مصورو الأفراح بالذات لأني عارف أنهم شايفين أنه لازم ينزلوا صور باستمرار علشان يجيلهم شغل، أولا افتكر ربنا وكتابك أهم ولا شوية شغل ! ثانيا خليك حِرك صور صور تقدر تنشرها زي صور التفاصيل مثلا علي كام بورتريه محترمين مافيش فيهم شيء مثير او شيء يفتن الناس مش لازم تنشر كل الصور، ورزقك مش هيقل بالعكس هتتفتح عليك من وسع -بإذن الله-.
بالنسبة للشباب المقبلين علي فرحهم، سبق وقولت من سنين كتير في عز ماكنت مصور أفراح أني شايف أن كل ده صرف علي الفاضي هو كتب كتاب ثم جلسة تصوير محترمة خارجية وسافروا اتفسحوا ولا أعملوا عمره أو إلى شايفينه مناسب للفلوس دي اعملوه بيه، الأهم بلاش تقلدوا الصور المنتشرة حاليا أحنا عدينا الغرب في التفنن في التعري والتصوير المبتذل فنيا ودينيا مع أننا واخدين منهم فكرة جلسة التصوير أصلا وهما معظم صورهم هادية وطبيعيه وارتجاليه الي حد ما وده كله جميل وده الي كنت بحاول اعمله لما كنت بصور أفراح.
تلخيص كل الرغي ده ، افتكروا أن الصور إلى بننشرها دي بتتكتب في كتابنا، فلتر الصور إلى هتنشرها ، تقليل الحرام شيء كويس والابتعاد عنه تمام أفضل وأفضل وتقليل الحرام ليه أثر علي النفس والقلب يخليك تقدر تبعد عنه تمام، ماتتحججوش بالظروف والأمر الواقع وأنه عادي، كلمة (فن) مش كلمة سحرية بتحول الحرام حلال.
طبعا انا عمال أقول تصوير أقصد فوتوغرافيا وفيديو، وكمان كلامي ينفع لأي شيء بننشره علي السوشيال ميديا نشغل عقلنا قبل ما ندوس مشاركة، من يومين جه قدامي فيديو لبنت محجبة " يترقص بعنف" رقصة غريبة والناس محوطاها وبيتفرجوا غالبا في مسابقة ما أنا ماعرفش بس الفيديو لا يليق نهائيا بالحجاب أو ببنت مسلمة أبدا أبدا أبدا يعني، أو الي بينشروا فيديو لمغنيه ما بترقص او هي اصلا رقاصه وبتغني خلنا صرحا، أنا بستغرب جدا مش من الراقصة لا أنا مستغرب من إلى بينشروا الفيديوهات دي!!! انتوا ازاي جالكم قلب تنشرو فيديو زي كده وتحاسبوا علي كل إلى هيشوفواه عن طريقكم! ده شيء مُرعب جدا جدا جدا لو فكرتوا فيه لأقل من دقيقة كده بتركيز ممكن تعيطوا من الخوف والله.
السوشيال ميديا بقت زي بنك للسيئات تنشر عليها سيئة ترجعلك فوقيها فوائد سيئات من الناس إلى اتفرجوا علي سيئتك وطول مانت سايب سيئاتك منشوره الفوائد بتزيد والحسابة وبتحسب.
{ إلا الذين تابوا وأصلحوا وبينوا فأولئك أتوب عليهم وأنا التواب الرحيم ( ١٦٠ ) } [سورة البقرة]
إلى أنا كاتبة ده مش فتوى ولا تصريح بأنه عادي نصور نساء وننشر الصور حتى لو محجبات ومحتشمات دي نقطة ممكن تسئلوا فيها أصحاب العلم، أنا بتكلم كالمسلم عن مشكلة بيمر بيها ناس كتير وحاولت اوري الناس طريقه يقللوا فقط بيها الحرام لكن لو حد جه قال التصوير أصلا حرام هو/ هي مش متعصبين ولا حاجة لأن في شيوخ عِظام حرموا التصوير الفوتغرافي فعلا إلا للضرورة والي بيقولوا التصوير عليه خلاف برضو صح لأن في برضو علماء خرجوا التصوير الفوتغرافي من تحريم التصوير لأسباب مذكورة بدقة.
⠀
ما فيش حد يقدر يقول أن تصوير النساء ونشر الصور علي الإنترنت للعامة مهما كانت درجة الاحتشام حلال ... لذلك لو حد فكر أو يفكر وقدر أو بيشوف ازاي يقدر مايصورش وماينزلش صور نساء من الأساس ده مش شخص متشدد ولا متخلف ولا رجعي، ده شخص عايز يتجنب الشبهات لأنه عارف أن في يوم آخر وحساب دقيق جدا
⠀
أحنا عبادا لله مش للتحضر وشكلنا قدام الناس واصل هيقولوا عليا مش عارف إيه !
⠀
وتاني كلمة (فن) مش كلمة سحرية بتحول الحرام حلال